Si të dallojmë çrregullimin e vëmendjes me hiperaktivitetin dhe impulsivitetin

Psikologja e njohur, Lorela Garuli, këtë herë sjell disa referime për të dalluar çrregullimet e vëmendjes me hiperaktivitetin dhe impulsivitetin te fëmijët. Për më tepër lexoni artikullin e mëposhtëm.

Çrregullimi i vëmendjes me hiperaktivitet përcaktohet si shfaqja e një grupi sjelljesh ku fëmija paraqet nivele impulsiviteti, mungesë vëmendjeje dhe hiperaktiviteti më të lartë sesa fëmijët e tjerë të së njëjtës moshë. Zakonisht këto vështirësi shfaqen përpara moshës shtatë vjeçare. 

ADHD konsiderohet çrregullimi më i përhapur i periudhës së fëmijërisë së hershme dhe prek më shumë djemtë sesa vajzat. Simptomat dhe karakteristikat e ADHD-së ndahen në tre lloje dhe janë si më poshtë:

Mungesa e vëmendjes

– Bën gabime të shpeshta pakujdesie;

– Nuk i kushton vëmendje detajeve;

– Harron ndjekjen e rutinave dhe detyrave të përditshme;

– Duket sikur nuk dëgjon kur i flasin;

– Nuk e mban dot vëmendjen në kryerjen e detyrave apo gjatë lojës;

– Ka vështirësi në organizimin e detyrave apo aktiviteteve;

– Nuk i ndjek dot udhëzimet që i jepen;

 – Shpesh humbet gjëra të cilat janë të domosdoshme për detyrat apo veprimtaritë (libra, fletore).

– Shpërqendrohet dhe hutohet lehtësisht.

Hiperaktiviteti

– Bën lëvizje përsëritëse me duar ose me këmbë, në shenjë nervozizmi ose padurimi;

– Nuk rri ulur në klasë apo në mjedise të tjera, në të cilat qëndrimi ulur është i nevojshëm;

– Vrapon, kërcen, hidhet së tepërmi në situata të papërshtatshme.

– Flet shumë dhe pandërprerë;

– Është gjatë gjithë kohës në lëvizje dhe duket sikur nuk lodhet kurrë.

Impulsiviteti

– Ka vështirësi në mbajtjen e radhës dhe kur i duhet të presë;

– Nis të kthejë përgjigje përpara se t’i bëhet pyetja e plotë;

– Ndërpret të tjerët kur flasin, futet në mes të një loje, bisede apo aktiviteti që të tjerët po kryejnë. 

Lorela Garuli, psikologe

© Portali Shkollor – Të gjitha të drejtat e rezervuara. Ndalohet kopjimi pa lejen tonë.