Filloreta Mustafa-Dermaku, mësimdhënëse në shkollën fillore të mesme të ulët “Ismail Qemali” në Prishtinë, së bashku me nxënësit e saj të klasës IV ka realizuar një gamë aktivitetesh në klasë për Ditën e Flamurit.
Sapo hyra në klasë, të gjithë nxënësit më mirëpritën veshur kuq e zi, me buzëqeshje të madhe në fytyrë, dhe duke mbajtur balona në duar… Sa pamje e bukur!
Në këtë ambient të ngrohtë, ora mësimore filloi me nxënësit duke kënduar me shumë zemër “Xhamadani vija-vija” dhe “Kuq e zi”.
Mësimdhënësja Filloreta Mustafa-Dermaku u shpjegoi nxënësve rreth festës së 28 Nëntorit dhe ata e dëgjonin me shumë kujdes. Më pas, ajo shpërndau edhe disa fleta pune me motive të Ditës së Flamurit. Aktiviteti zgjati rreth 10 minuta.
Më pas, më shumë dëshirë e vullnet, nxënësit modeluan me fara të zeza shqiponjën.
Për këtë aktivitet duheshin:
- ngjitës
- fara të zeza
- letër e printuar me shqiponjë.
Nxënësit u kënaqën nga ky aktivitet dhe pamja më e mrekullueshme ishte t’i shihje ata me sa vullnet bashkëpunonin dhe i shfrytëzonin bashkë mjetet e njëri-tjetrit. Aktiviteti zgjati rreth 15 minuta.
“Jam shumë e lumtur që jam mësimdhënëse e një klase të mbushur me nxënës kaq të edukuar dhe me shumë interes në mësim”, tha mësimdhënësja Filloreta Mustafa – Dermaku për Portalin Shkollor.
Gjatë bashkëbisedimit me disa nxënës, kuptova se Festa e 28 Nëntorit festohej edhe në shtëpitë e nxënësve bashkë me familjet e tyre, duke dëgjuar muzikë dhe duke shikuar ndonjë dokumentar rreth kësaj dite të rëndësishme.
Ora mësimore u mbyll nga nxënësit që luajtën me balona.
Më poshtë gjeni një video dhe foto të realizuara gjatë aktiviteteve.
Era Baliu
© Portali Shkollor – Të gjitha të drejtat e rezervuara. Ndalohet kopjimi pa lejen tonë.
