Në një aktivitet të organizuar me rastin e 95-vjetorit të Bibliotekës Kombëtare kryeministri Rama, ministrja e Kulturës Kumbaro dhe drejtoresha e këtij institucioni vlerësuan autorët e letërsisë shqipe.
Çmimi Kombëtar “Lumo Skëndo” shkoi për botimin me poema “Vrima” të shkrimtares Rita Petro. Në motivimin e vlerësimit, ministrja Mirela Kumbaro nënvizoi: “Botim elegant që harmonizon konceptualen e imazhit dhe artin e poezisë me provokimin estetik duke pasuruar shijen bibliografike të leximit.”
Trofeu iu dorëzua shkrimtares Rita Petro nga Kryeministri Rama dhe ministrja e Kulturës Mirela Kumbaro.
Në aktivitet u bë me dije se në 2014-ën janë investuar nga buxheti i shtetit plot 300 mijë euro për të bërë një investim për pajisje të specializuara për dixhitalizimin e librave të Bibliotekës Kombëtare dhe në një vit falë këtij investimi, është 10-fishuar sasia e faqeve të dixhitalizuara në këtë bibliotekë.
Janë siguruar të gjitha financimet dhe së shpejti përfundon projekti i integrimit të hapësirave pas 25 vjet ndarje të godinës për veprimtari tregtare në dëm të Bibliotekës Kombëtare. Transformimi i hapësirës së riintegruar të Bibliotekës në një mjedis ku të gjitha funksionet, tradicionale dhe të reja që vijnë nga procesi i transformimit teknologjik, do të mbështeten financiarisht nga qeveria bazuar mbi projektin inovativ që po behet me mbështetjen e Bashkimit Europian.
Shqipëria ka një rrjet të trashëguar relativisht të gjerë të bibliotekave publike, por fatkeqësisht është një rrjet i amortizuar sepse në 25 vjet nuk është bërë asgjë.
©Portali Shkollor – Të gjitha të drejtat e rezervuara. Ndalohet kopjimi pa lejen tonë
