Ky është plani i një aktiviteti të realizuar në një shkollë 9-vjeçare, klasa e dytë. Aktiviteti është organizuar në kuadër shkollës si qendër komunitare. “Unë jam pjesë e botës së madhe” ndiqni hap pas hapi arritjen e objektivave të kësaj teme.
Plan aktiviteti: Shkolla si qendër komunitare
Tema: Unë jam pjesë e botës së madhe
Edhe pse vijmë nga lloje të ndryshme familjesh, me kultura, zakone dhe tradita të ndryshme, ne jemi pjesë e botës së madhe, e botës së pasurisë së vlerave njerëzore…
Shkolla 9- vjeçare, Cikli i Ulët, Klasa e dytë
“UNË JAM PJESË E BOTËS SË MADHE”
Synimi: Respektimi i diversitetit kulturor në komunitet
Objektivat:
Në fund të veprimtarisë nxënësi të jetë i aftë:
• Të njohë dhe të dallojë zakone e tradita të ndryshme krahinore të komunitetit ku jeton.
• Të sjellë informacion rreth kulturës / traditave të origjinës së tyre familjare.
• Të flasë për festat familjare, duke veçuar tradicionalen e festës.
• Të sjellë në shkollë veshje dhe punime të ndryshme tradicionale të krahinës së tyre.
• Të shkëmbejë dhe të marrë njohuri nga shoku / shoqja rreth traditave të tyre familjare.
• Të respektojë shokët / shoqet pavarësisht origjinës së tyre, si qytetarë të barabartë të një komuniteti /shoqërie.
Partnerët: Qendra Kulturore e Fëmijëve, prindër, nxënës, mësues.
Mjetet: Kostume popullore dhe punime të ndryshme të punuara me dorë, video – projektor, magnetofon, CD me këngë e valle të trevave të ndryshme të Shqipërisë, vegla muzikore, kartonë, lapustila, kartolina, etj.
Struktura e zhvillimit të veprimtarisë
Faza përgatitore:
a) Takim me prindër. Njohja me temën e veprimtarisë, ku prindërit shkëmbejnë ide dhe japin sugjerime rreth realizimit të saj.
b) Përcaktimi i krahinave që do të përfaqësohen nga pjesëtarë të komunitetit të prindërve.
c) Përcaktimi i prindërve vullnetarë.
d) Përcaktimi i mënyrës së kontributit të tyre.
e) Takimi me përfaqësues të Qendrës Kulturore të Fëmijëve për të na ndihmuar me mjete që ata kanë.
f) Sigurimi, grumbullimi i bazës materiale dhe përgatitja e posterave/ vizatimeve.
g) Gjetja e fotove / ilustrimeve nga interneti, me veshje popullore sipas krahinave dhe përgatitja në POWER – POINT e prezantimit të tyre.
h) Sigurimi i CD-ve me këngë e valle nga treva të ndryshme të Shqipërisë.
i) Përgatitja e palestrës së shkollës për realizimin e veprimtarisë.
Faza e realizimit të veprimtarisë
( Bisedë – Demonstrim – Vëzhgim)
Hapi i parë: Referat i përgatitur nga mësuesja rreth respektimit / ruajtjes së kulturave, vlerave dhe traditave të ndryshme krahinore.
Hapi i dytë: Paraqitje me video- projektor të ilustrimeve të gjetura me karakteristika gjeografike dhe etnografike të krahinave: Skrapar, Dibër dhe Durrës.
Hapi i tretë: Sfilatë me veshje popullore nga nxënës të klasës.
Hapi i katërt: Vëzhgim i ekspozitës me punime dore e druri të sjella nga prindërit, me vegla muzikore të sjella nga QKF-ja, si dhe i posterave / vizatimeve të përgatitura nga nxënësit.
Hapi i pestë: Mbyllja e aktivitetit me muzikë e valle nga treva të ndryshme të vendit tonë.
© Portali Shkollor- Të gjitha të drejtat e rezervuara. Ndalohet kopjimi pa lejen tonë.
